關於

【我的母語敢是台語？】

會曉聽、會曉講、會使佮阿媽自然對話，毋過自細漢上捷講的卻是華語，有時因為好耍刁故意咬字咬甲足標準的時，會予忍袂牢的阿爸用台灣國語應一句：『在家請說母語。』幾落擺了後有點薄仔憢疑，我的母語敢是台語？

抱著這款的憢疑，一直到讀大學，為著一門台語課必須愛上台試教，第一改開始認真「讀」台語，上網揣一篇台語小論文、內容想予好就上台，會記得我講的是疊詞。干焦十分鐘，因為聲音特別，予老師指定參加台語朗讀比賽，就按呢一跤踏入台語的世界，發現台語的趣味佮濟濟使人更加憢疑的代誌。一路行來放放，十幾年來，綴老師學台語、完成比賽、完成學業、通過培訓，然後這馬佇國小、高中教台語文，忽然間感覺來系統化整理一寡家己搜揣的學習資源，若會使予別人感受著一點仔我捌感受著的趣味，閣較佮意台語一屑仔。世界敢會因為按呢，嘛變甲愈趣味咧？

就共試看覓咧！ 予佮我仝款對台語有興趣的人有濟濟方便的資源通揣、通用、通學。

　　咱來做伙學台語、耍台語。
Tâi-gí 做伙耍
方儷潔  2022.02

 台語認證 C1 |電腦教學