雅雯是一位真有才情的教授，也是經驗豐富的老師。伊對臺語語言學的了解自然是毋免加講。這幾年，伊koh 定受中央和地方邀請，參與真濟和臺語課綱、課本、臺華雙語教學有關係的相關事務，累積真深厚的經驗。遮的學識、經驗，自然lóng 會表現佇伊的作品內面。所以，這本《臺語拼音做伙學》雖罔看冊名kánn-ná 是針對初學者的教材，總是讀者若認真共看落去，就會發現，冊裡其實藏真濟臺語語音和教學法的鋩鋩角角。

　　咱知影，語言的祕密有真大的部分是藏佇語音內面。親像人稱代詞的複數：guán（阮）/lán（咱）/lín（恁）/in 遮的字lóng 是用「n」這个音（後綴）結尾，代表複數；koh 親像姻親的peh（伯）/ （姆），tsik（叔）/tsím（嬸），kū（舅）/kīm（妗），翁仔某的稱呼，lóng 著用互相配合（仝款）的子音，另外女性也愛用「m」的音（後綴）結尾。所以，若是正經beh 了解臺語khah 深層的意義，會當表現語音的羅馬字（羅馬拼音）是真重要的工具。毋才課綱會規定國小三年開始，臺語課全面愛教羅馬字。

　　總是「羅馬字」欲按怎教？欲按怎學leh？這當然著先對臺語/ 字母的規則開始。雅雯老師這本《臺語拼音做伙學》，佇一開始就共羅馬字的，包括聲母、韻母、聲調符號的組成原則、變調的規律和例外的變化⋯等等，lóng 講kah 真清楚。

　　除了清楚的理論以外，其實我個人感覺這本冊上大的特色是伊清楚的圖表和濟濟的練習題：

　　這馬的學生學習的方法kap 往過無仝，khah 注重圖像記憶，對長篇文字的理解khah 僫。佇這本《臺語拼音做伙學》內面，雅雯老師佇逐个單元，lóng 用豐富的圖表，無仝的色水共重點、鋩角標示kah清清楚楚。

　　另外，若beh 完全學會曉羅馬字，除了了解道理，大量的練習也是必須愛有的過程。這本冊內面逐單元的練習題數量真濟，學生若照逐个單元附的練習題認真落去做，真緊就會當掌握羅馬字。

　　總講一句，就我看起來，這本《臺語拼音做伙學》是老師佇學校教；學生家己學，lóng 真好用的教材，佇遮推薦予對臺語有興趣的各位。也向望雅雯老師koh 再陸續推出其他學臺語的工具冊。

臺中教育大學臺灣語文學系副教授／

十二年國教閩南語課綱委員兼副召集人 

何信翰